महिलाको गुप्तांगका लागि कण्डम उत्तम : बढाउँछ मित्र जिवाणु
यौन सम्पर्कका बेला पुरुषले कण्डम प्रयोग गर्दा त्यसको सकारात्मक असर महिलाको योनीमा पर्ने एक अध्ययनले देखाएको छ ।
चीनको बेइजिङस्थित एक अस्पतालमा गरिएको अध्ययनले यौन सम्पर्कका बेला कण्डमको प्रयोगले महिलाको योनीमा मित्र जिवाणुको संख्यामा वृद्धि गर्ने तथ्य पत्ता लगाएको हो ।
१६४ जना स्वस्थ विवाहित महिलामा उक्त अध्ययन गरिएको थियो जसले गर्भनिरोधका लागि पिल्स लगायतका हर्मोनल उपाय अपनाएका थिएनन् । ती मध्ये ७२ जना महिलाका लोग्नेले कण्डम प्रयोग गर्थे, ५७ जना महिलालाले आइयुडी अर्थात् कपर टी तथा ३५ जना महिलाले प्राकृतिक विधि (महिनावारी भएपछि गर्भ रहने बढि सम्भावना भएका दिनमा सम्भोग नगर्ने विधि) अपनाएका थिए ।
शोधकर्ताहरुले त्यस क्रममा ती महिलाहरुको योनीरसमा पाइने लाभदायी ल्याक्टोब्यासिलस ब्याक्टेरियाको संख्याको अध्ययन गरे । यी ब्याक्टेरियाले योनीरसलाई अम्लीय बनाउने र अन्य हानिकारक ब्याक्टेरियाको इन्फेक्सन रोक्न सघाउ पूराउँछन् ।
त्यसक्रममा के पाइयो भने श्रीमानले कण्डम प्रयोग गर्ने महिलाहरुको योनीरसमा बढि संख्यामा ती लाभदायी ब्याक्टेरिया थिए ।
कण्डमले महिलाको योनीको स्वास्थ्यमा सकारात्मक असर पार्नु अर्थात् यो ब्याक्टेरियाको संख्या बढि हुनुको मुख्य कारण भनेको कण्डम प्रयोगबाट महिलाको योनीमा विर्य र्झन नपाउने र त्यसबाट महिलाको योनी रसको प्राकृतिक अम्लपनामा कुनै असर नपर्नु रहेको लाइभ साइन्स जर्नलमा छापिएको समाचारमा उल्लेख छ । विर्यमा क्षारीय गुण हुने भएकाले त्यसले योनीरसको प्राकृतिक पर्यावरणमा असर पूराउँछ ।
तथापि शोधकर्ताहरुले अनिच्छित गर्भ रोक्न कण्डम सबैभन्दा उपयुक्त उपाय भने नरहेको बताएका छन् । कण्डमको असफलता दर उच्च अर्थात् १५ प्रतिशत हुने बताइन्छ । जबकी आइयुडीको असफलता दर केवल ०.६ प्रतिशत मात्र हुन्छ ।
0 comments
Write Down Your Responses