समानुपातिकतर्फ सप्तरीबाट तीन महिलासहित आठ सभासद्
सप्तरी, १७ पुस । संविधानसभामा सप्तरी जिल्लाबाट अहिलेसम्म प्रत्यक्ष र समानुपातिकतर्फबाट गरी १४ जना सभासद्ले प्रतिनिधित्व गर्ने निश्चित भएको छ । विभिन्न दलले निर्वाचन आयोगमा बुझाएको समानुपातिकतर्फको सभासद् मनोनयनको सूचीमा सप्तरीका तीन महिलासहित आठ जनाको नाम समावेश
नेकपा (एमाले)बाट दुई, मधेसी जनअधिकार फोरम (लोकतान्त्रिक)बाट दुई, नेपाली काँग्रेसबाट एक, एकीकृत नेकपा (माओवादी)बाट एक, राप्रपा नेपालबाट एक र नेकपा (संयुक्त) बाट एक जना समानुपातिकतर्फको सभासद् बन्नुभएको छ ।
मधेसी जनअधिकार फोरम नेपाल र सङ्घीय समाजवादी पार्टीले समानुपातिक सभासद्को सूची बुझाउन बाँकी रहेकाले सप्तरीबाट सभासद् बन्नेको सङ्ख्या अझ बढ्न सक्ने बताइन्छ ।
एमालेले सत्यनारायण मण्डल, रञ्जु ठाकुर झा, फोरम (लोकतान्त्रिक)ले डा. सुबोध पोखरेल, रमणि राम, काँग्रेसले रञ्जित कर्ण, एमाओवादीले राम कार्की, राप्रपा नेपालले गङ्गाप्रसाद यादव र नेकपा (संयुक्त)ले मिथिला चौधरीलाई समानुपातिकतर्फ संविधानसभा सदस्यमा मनोनयन गरेका छन् ।
समानुपातिकतर्फ सभासद्को सूचीमा पर्नुभएकी रमणि रामबाहेक सबै जना नयाँ हुन् । अघिल्लो संविधानसभामा तराई मधेस लोकतान्त्रिक पार्टीका तर्फबाट समानुपातिक सभासद् बन्नु भएकी राम पछि महेन्द्र राय यादव नेतृत्वमा पार्टी विभाजन गरी तराई मधेस लोकतान्त्रिक पार्टी नेपाल गठन गर्नुभएको थियो । उहाँ सो पार्टीबाट सिँचाई राज्यमन्त्री समेत बन्नुभएको थियो । सप्तरीको डिमन गाविस निवासी राम यसपालिको संविधानसभा निर्वाचन हुनुभन्दा केही महिनाअघि फोरम (लोकतान्त्रिक)मा प्रवेश गर्नुभएको थियो ।
सप्तरीको कमलपुर गाविसका मण्डल एमालेका केन्द्रीय सदस्य हुनुहुन्छ भने जिल्लाको तिलाठी गाविस निवासी झा एमाले निकट अखिल नेपाल महिला संघका केन्द्रीय सचिव हुनुहुन्छ । झा यसअघि एमालेकै तर्फबाट २०६४ सालको संविधानसभा निर्वाचनमा सप्तरीको क्षेत्र नं ३ बाट प्रत्यक्षतर्फ चुनाव लड्नु भएको थियो ।
सप्तरीको फत्तेपुर गाविस निवासी डा. पोखरेल यसपालिको संविधानसभा निर्वाचनको पूर्वसन्ध्यामा फोरम (लोकतान्त्रिक)मा प्रवेश गर्नुभएको थियो । काँग्रेसबाट समानुपातिकतर्फ सभासद् हुनुभएका सप्तरीको कोबर्साइन गाविस निवासी कर्ण नेपाल विद्यार्थी संघका केन्द्रीय अध्यक्ष हुनुहुन्छ ।
यस्तै एमाओवादीबाट सभासद् बन्नुभएका सप्तरीको फत्तेपुर गाविस निवासी राम कार्की एकीकृत नेकपा माओवादीका केन्द्रीय सदस्य हुनुहुन्छ । राप्रापा नेपालका तर्फबाट समानुपातिक सभासद् बन्नुभएका जिल्लाको १ नम्बर योगिनियाँ गाविस निवासी यादव राप्रपा नेपालका केन्द्रीय सदस्य हुनुहुन्छ । उहाँ जिल्ला विकास समिति सप्तरीका पूर्व उपसभापति समेत हुनुहुन्छ । त्यस्तै नेकपा (संयुक्त)बाट समानुपातिकतर्फको सभासद्मा मनोनित चौधरी राजविराज नगरपालिकाका स्थायी निवासी हुनुहुन्छ ।
कुल ६ वटा निर्वाचन क्षेत्र रहेको सप्तरीमा गएको मङ्सिर ४ गते भएको संविधानसभा निर्वाचनमा प्रत्यक्षतर्फ तीनवटा क्षेत्रमा एमाओवादी, दुई वटामा काँग्रेस र एउटामा एमालेले सफलता हात पारिसकेको छ ।
प्रत्यक्षतर्फ सप्तरीका क्षेत्र नम्बर १, २ र ३ मा एमाओवादीका मानपुर चौधरी, अशोक कुमार मण्डल, उमेश कुमार यादव, क्षेत्र नं ४ मा एमालेका ताराकान्त चौधरी, क्षेत्र नं ५ र ६ मा काँग्रेसका तेजुलाल चौधरी र सुरेन्द्रप्रसाद यादव विजयी भइसक्नुभएको छ ।
अघिल्लो संविधानसभामा सप्तरीबाट प्रत्यक्ष र समानुपातिक गरी विभिन्न दलका १६ सभासद्ले प्रतिनिधित्व गर्नुभएको थियो ।
0 comments
Write Down Your Responses