एजेन्सी,पुष । चिडियाखानामा आउने पर्यटकलाई स्वागत गर्न राखिएको चराले अश्लील शव्द बोलेर गाली गरेको आरोपमा चीनको उहान स्थित जिउफेंग चिडियाघरको अधिकारीहरुले चरालाई लाई पक्राउ गरि एकल हिरासतमा राखिएको बताएका छन् ।  चिडियाखाना आउने पर्यटकलाई अश्लील शव्द बोलेर हैरान पारेपछि डांग्रे अर्थात् सारौ चरालाई पक्रिएको हो । उक्त डंग्रे चरालाई चिडियाखानाले लालन पालन गरी बोल्ने तालिम दिएर पाहुनाको स्वागत गर्ने जिम्मा दिएको थियो । 

 सुगालाई जस्तो बोल्न सिकाइएको उक्त मैना चरालाई अह्राइएपनि त्यो चराले एकाएक पाहुनाहरुलाई फोहोर तथा अश्लील शव्द बोलेर गाली गर्न थालेपछि चिडियाखानाका अधिकारीहरु नै अचम्ममा परेका थिए । आफुहरुले उक्त चरालाई सभ्य भाषा सिकाएको भएपनि चिडियाखाना घुम्न आएका कतिपय उरन्ठेउला युवाहरुले बोलेको अश्लील शव्दको सिको चराले गरेको र सोही अश्लील शव्द बारम्बार बोल्ने गरेको अधिकारीहरुको दाबी छ ।

 अश्लील शव्द बोल्ने क्रम बढेपछि उक्त चरालाई समातेर एक्लै पिञ्जडामा राखिएको छ । यो प्रजातिको चराको निकै तिक्ष्ण स्मरण शक्ति हुने र मान्छेको बोलीको सहजै नक्कल गर्न सक्ने भएकाले केही आगन्तुकले बोलेको अश्लील शव्दलाई टपक्क टिपेर बोलेको हुनसक्ने अनुमान अधिकारीहरुले लगाएका छन् । खराब बोल्ने बानी नछुटेसम्म उक्त चरा थुनामुक्त नहुने चिडियाखाना जनाएको छ ।